✽   आनंदाची बातमी   ✽

कुडाळदेशकर गौड ब्राह्मण सहयोग,डोंबिवली तर्फे शिक्षणतज्ञ रामभाऊ परुळेकर आणि मुख्याध्यापक बाबुराव परुळेकर स्मृती शैक्षणिक कार्य पुरस्कार - २०२६ डोंबिवलीतील सुप्रसिद्ध ओंकार शिक्षण समूहाच्या संस्थापक श्रीमती दर्शना सामंत आणि कामगार नेते डॉ.दत्ता सामंत सामाजिक कार्य पुरस्कार -२०२६ कुडाळ येथील नुकतेच निवृत्त झालेले कर्तव्यतत्पर सरकारी अधिकारी श्री प्रफुल्ल वालावलकर यांना जाहीर. रविवार, २८ जून २०२६ रोजी कुडाळ येथे होणाऱ्या प्रेरणा परिषदेत हे पुरस्कार प्रदान करण्यात येतील.

✽   शैक्षणिक साहित्य वाटप   ✽

कुडाळदेशकर गौड ब्राह्मण सहयोग, डोंबिवली तर्फे दरवर्षी जो मागेल त्याला वह्या या तत्वावर वह्यावाटप केले जाते. सहयोगचे आश्रयदाते असलेले श्री शशिकांत माईणकर आणि कुटुंबीय आणि श्री दीपक देसाई आणि कुटुंबीय यांच्या सन्मानार्थ हे वाटप करण्यात येते. *वहीच्या मलपृष्ठावर ज्ञातीतील प्रभावशाली व्यक्तिमत्वाची नावे आणि त्यांची थोडक्यात माहिती छापली जाते, या व्यक्तींच्या कर्तृत्वातून विद्यार्थ्यांना प्रेरणा मिळावी हाच या उपक्रमाचा उद्देश्य.* आपण ही माहिती वाचावी ही नम्र विनंती. गणेश देसाई डोंबिवली

✽   समन्वय अधिवेशन*   ✽

रविवार, दिनांक १७ मे २०२६ रोजी कुडाळदेशकर भवन,डोंबिवली येथे महाराष्ट्रातील सर्व कुडाळदेशकर गौड ब्राह्मण ज्ञातीसंस्थांचे समन्वय अधिवेशन होणार आहे.या निमित्ताने महाराष्ट्राच्या विविध भागातील आपल्या ज्ञातीसंस्थांचे पदाधिकारी एकत्र येऊन विवाह मंडळ, विद्यार्थ्यांसाठी शिष्यवृत्ती, वैद्यकीय मदत निधी तसेच गरजूंना मदत अशा विविध विषयांवर चर्चा करणार आहेत आणि भविष्यवेधी नियोजनाची सुरुवात होणार आहे. कुडाळदेशकर गौड ब्राह्मण सहयोग,डोंबिवली या संस्थेने स्वतःच्या ६० वर्ष पूर्तीनिमित्त या अधिवेशनाचे आयोजन केले आहे.

✽   प्रेरणा परिषद २०२६   ✽

सहयोग आणि विद्यावृद्धी समाज आयोजित प्रेरणा परिषद हा कार्यक्रम रविवार, २८ जून २०२६ रोजी कुडाळ येथे होणार आहे.

✽   कौतुक आणि कृतज्ञता सोहळा - २०२६   ✽

कुडाळदेशकर गौड ब्राह्मण सहयोग,डोंबिवली यांच्यातर्फे येत्या शनिवारी १५ ऑगस्ट २०२६ रोजी "कौतुक आणि कृतज्ञता सोहळा" या वार्षिक कार्यक्रमाचे आयोजन करण्यात आले आहे. *कार्यक्रमाचे स्वरूप* *सायंकाळी ५.०० वाजता* - ज्ञातीतील गुणवंत विद्यार्थ्यांचा कौतुक सोहळा *सायंकाळी ६.०० वाजता* - सहयोग निर्मित " जीवन त्यांना कळले हो " या सहयोगचे आश्रयदाते श्री दीपक शांताराम देसाई आणि सौ सरिता दी. देसाई यांच्यावरील माहितीपटाचे स्क्रिनिंग सायंकाळी ७.०० वाजता* - ज्ञातीतील ७५ वर्षे पूर्ण करणाऱ्या ज्येष्ठांचा कृतज्ञतापूर्वक सन्मान. *कौतुक आणि कृतज्ञता सोहळा - २०२६* कुडाळदेशकर गौड ब्राह्मण सहयोग,डोंबिवली यांच्यातर्फे येत्या शनिवारी १५ ऑगस्ट २०२६ ज्ञातीतील ७५ वर्षे पूर्ण करणाऱ्या ज्येष्ठांचा कृतज्ञतापूर्वक सन्मान. सहयोगचे कार्यवाह श्री भिकाजी वि. वालावलकर श्री विकास दिगंबर उर्फ राजाभाऊ पाटकर ओंकार शैक्षणिक समूहाच्या संस्थापिका श्रीमती दर्शना दिवाकर सामंत श्रीमती शुभांगी लक्ष्मीकांत देसाई श्री विश्वनाथ लक्ष्मण परुळेकर श्री लक्ष्मण रामकृष्ण खानोलकर श्रीमती संगीता सुरेश अवसरे श्री सुरेश मातोंडकर श्रीमती सुनीता शंकर माईणकर श्री विजय श्रीधर सामंत कार्यक्रमाची सांगता स्नेहभोजनाने होईल.सर्व ज्ञातीबांधवांनी गुणवंत विद्यार्थ्यांचे कौतुक आणि ज्येष्ठांप्रती कृतज्ञता व्यक्त करण्यासाठी जरूर उपस्थित रहावे.

✽   झेंडा वंदन   ✽

कुडाळदेशकर गौड ब्राह्मण सहयोग,डोंबिवली यांच्या तर्फे उद्या भारताच्या स्वातंत्र्यदिनाच्या निमित्ताने कुडाळदेशकर भवनच्या हिरवळीवर सकाळी ८.१५ वाजता झेंडावंदन आयोजित केले आहे. झेंडावंदन सहयोगचे आश्रयदाते श्री दीपक देसाई यांच्या हस्ते होणार आहे,त्यानंतर सहयोग सांस्कृतिक कट्टा यांच्या तर्फे देशभक्तीपर गीतांचा सुश्राव्य गीतांचा कार्यक्रम होणार आहे. तरी सर्व बांधवांनी उपस्थित रहावे असे आवाहन कार्यवाह श्री भिकाजी वालावलकर यांनी केले आहे. जय हिंद

✽   जीवन त्यांना कळले हो प्रेरणादायी माहितीपट   ✽

https://youtu.be/wdHi1R3Flh0?si=2EpVBmDTjjQxJJOY कुडाळदेशकर गौड ब्राह्मण सहयोग, डोंबिवली यांनी संस्थेचे आश्रयदाते श्री दीपक शांताराम देसाई आणि सौ सरिता दीपक देसाई यांच्या आयुष्यावर - त्यांच्या शैक्षणिक, व्यावसायिक आणि सामाजिक कारकिर्दीवर बनवलेला हा माहितीपट आहे. १५ ऑगस्ट २०२६ रोजी कुडाळदेशकर भवनातील कै. अण्णासाहेब माईणकर सभागृहात हा माहितीपट प्रदर्शित झाला. शालेय विद्यार्थी, युवक, ज्येष्ठ नागरिक यांच्यासह सर्वांनीच हा प्रेरणादायी माहितीपट पाहावा आणि इतरांस ही दाखवावा असे आम्ही आवाहन करत आहोत. धन्यवाद गणेश देसाई कार्याध्यक्ष

✽   *श्री सत्यनारायण महापूजा*   ✽

*रविवार,३० ऑगस्ट २०२६ रोजी* कुडाळदेशकर भवन, डोंबिवली येथे श्री सत्यनारायण महापूजेचे आयोजन करण्यात आलं आहे पूजेच्या निमित्ताने खालील भजन आणि गायन सेवा पार पडणार आहे. सायंकाळी ४.०० ते ४.५० - स्वरांजली भक्तीगीत मंडळ यांचे सुश्राव्य भजन सायंकाळी ५.०० ते ६.५० - सहयोग सांस्कृतिक कट्टा आयोजित कराओके भक्तीगीतांचा सुरेल कार्यक्रम सायंकाळी ७.०० ते ८.०० - विठ्ठल रखुमाई भजन मंडळाचे सुश्राव्य भजन सर्व सदस्य आणि त्यांच्या कुटुंबीयांनी *सायंकाळी ४.०० ते ८.००* या वेळेत येऊन तीर्थ प्रसादाचा लाभ घ्यावा असे आवाहन कार्यवाह भिकाजी वालावलकर यांनी केले आहे.

✽   कॅरम लीग टूर्नामेंट   ✽

*सहयोग क्रिकेट कट्टा* तर्फे वेगवेगळे उपक्रम राबविण्यात येतात त्या अंतर्गत यावेळी सहयोग च्या खेळाडूंसाठी कॅरम लीग टूर्नामेंट चे आयोजन करण्यात आले होते .या मध्ये 12 वर्षापासून ते 60 वर्षांवरील खेळाडूंनी भाग घेतला होता.प्रत्येकी 13 match या जून पासून प्रत्येक शनिवार व रविवारी या दोन दिवशी सामने खेळले जात होते. सर्व खेळाडूंनी या स्पर्धेत उत्तम खेळ करून खेळाची मजा लुटली.पहिले 8 स्पर्धक हे बाद फेरी साठी पात्र ठरले त्यात 8 स्थानासाठी 12 वर्षाचा सारस प्रभू व 60 वर्षाचे हेमंत सामंत यांच्यात 2 ब्रेक चा सामना खेळवण्यात आला त्यात हेमंत सामंत हे विजयी झाले.या 8 जणांमध्ये बाद फेरी खेळवण्यात आली व त्यामध्ये हर्षद महाजन व सुनील सामंत हे अंतिम फेरी साठी पात्र ठरले त्यात हर्षद महाजन यांनी चुरशीच्या लढतीत सुनील सामंत यांचा 20 10 असा पराभव करून या स्पर्धेचे विजेतेपद पटकावले. विशेष म्हणजे सहयोग चे कार्यकारी मंडळ हे नेहमी अशा उपक्रमाला पूर्ण सहकार्य करते त्यामुळे हे उपक्रम पूर्णपणे यशस्वी रीत्या आयोजित करता येते.या स्पर्धेत सर्व खेळाडूंनी भाग घेऊन जे सहकार्य केले त्याबद्दल सर्वांचे मनापासून आभार. पारितोषिक वितरण प्रसंगी श्री.प्रदीप परुळेकर व श्री.हेमंत वालावलकर हे उपस्थित होते त्यांच्या हस्ते पारितोषिक वितरण करण्यात आले विशेष आभार श्री.हेमंत सामंत यांनी वेळोवेळी लागेल ती मदत केली. श्री तुषार नाईक

✽   रक्तदान शिबिर आणि मोफत तपासणी शिबिर   ✽

कुडाळदेशकर गौड ब्राह्मण सहयोग, डोंबिवली आणि विद्याधर सामंत फाउंडेशन या संस्थांच्या संयुक्त विद्यमाने रक्तदान शिबिर आणि मोफत तपासणी शिबिर आज रविवार,२७ सप्टेंबर २०२६ रोजी कुडाळदेशकर भवन येथे मोठ्या उत्साहात पार पडले. या शिबिरात सुप्रसिद्ध डॉ. निर्मलदत्त ठाकूर (M.D) यांनी उपस्थित राहून २४ जणांची तपासणी केली आणि मार्गदर्शन केले. ६७ जणांची मोफत रक्त तपासणी करण्यात आली तसेच ४० जणांनी स्वेच्छेने रक्तदान केले.रक्तदात्यात २६ पुरुष आणि १४ महिलांचा समावेश होता. विद्याधर सामंत फाउंडेशनच्या विश्वस्त आणि सहयोगच्या सदस्या श्रीमती विनया सामंत यांनी या उपक्रमाचे संचालन केले. सुमित नाईक, हेमंत सामंत, जयंत सामंत, हर्षद महाजन, डॉ प्रचिती सामंत, गौरवी परुळेकर आदी तरुण कार्यकर्त्यांनी विशेष परिश्रम घेतले.

✽   श्रद्धांजली सभा   ✽

सहयोगचे माजी कार्याध्यक्ष संतोष वसंत उर्फ बाळ सामंत वय वर्ष -६८ यांचे ६ सप्टेंबर २०२६ रोजी दीर्घ आजारपणात दुःखद निधन झाले. बाळ सामंत हे एक कलासक्त व्यक्तिमत्व होते,भजन आणि नाट्य कलेत त्यांनी विशेष योगदान दिले.सहयोग बरोबरच श्री मठ संस्थान,दाभोली तसेच गौड ब्राह्मण सभा अशा विविध संस्थांसाठी त्यांनी सक्रिय योगदान दिले. आपल्या ज्ञातीच्या या ज्येष्ठ कार्यकर्त्याला श्रद्धांजली देण्यासाठी सहयोगतर्फे शुक्रवार, दिनांक २ ऑक्टोबर २०२६ रोजी सकाळी १०.०० वाजता कुडाळदेशकर भवन, डोंबिवली येथे सभेचे आयोजन केले आहे. तरी सर्वांनी उपस्थित रहावे ही नम्र विनंती.

✽   *अनंत चतुर्दशीच्या मुहूर्तावर एक नवीन संकल्प*   ✽

कुडाळदेशकर गौड ब्राह्मण सहयोग,डोंबिवली यांच्या तर्फे आज अनंत चतुर्दशीच्या शुभ मुहूर्तावर एका नवीन प्रकल्पाचा संकल्प करण्यात आला. पूर्वीच्या काळात गुं.फ आजगावकर, वा.अ बांबर्डेकर अथवा परुळेकर आदींची कुडाळदेशकर ज्ञातीच्या इतिहासावर पुस्तके प्रकाशित झाली आहेत परंतु सद्य काळात ही पुस्तके उपलब्ध नाहीत. आपल्या ज्ञातीचा इतिहास, गुरुपरंपरा, सामाजिक योगदान, ज्ञातीसंस्था असा सर्वच बाजूंवर प्रकाश टाकणारे पुस्तक उपलब्ध व्हावे असे उद्दिष्ट डोळ्यासमोर ठेवून आज अशा नवीन पुस्तकाच्या निर्मितीचा आज संकल्प करण्यात आला. व्यासंगी लेखक आणि संशोधक श्री अमित सामंत यांनी या प्रकल्पाची धुरा स्वीकारली आहे.पुरेसा वेळ घेऊन , संशोधन करून,वेगळ्या वेगळ्या जाणकारांशी चर्चा करून एका उत्तम पुस्तकाची निर्मिती करण्याचा त्यांनी मानस बोलून दाखविला आहे. या पुस्तक निर्मितीच्या निमित्ताने कोणाकडे संदर्भ ग्रंथ,माहिती, कागदपत्रे असल्यास अथवा काही सूचना असल्यास श्री भिकाजी वालावलकर -9820933074 यांना संपर्क करावा असे आवाहन करण्यात येते. या प्रसंगी विद्यावृद्धीचे अध्यक्ष श्री न. ना पंतवालावलकर , श्री अमित सामंत तसेच सहयोगचे पदाधिकारी उपस्थित होते.